Ièrbetoeën aan: Jaer Heemskerk

Op zaoterdaag 17 december 2016 is ós ièrelid en taeves lid van verdeenste Jaer Heemskerk  in ’t hospice Doevenbos te Hôrs in de laeftièd van 94 jaor euverleeje. Röstig is Jaer dao taegen d’n aovend ingeslaope en gestorve, gelökkig det vaerder lieje um bespaard is gebleve!

Op vriedaag 4 november waar Jaer nog getuùge van ózze jaorlikse jubilarisse-aovend en zóng hae nao aafloup nog ós clubleed mei: De SVB jónges die geit noeëts verlaore!  “Ik wil ze gaer nog allemaol efkus zeen, meschiens is ’t waal de letste kièr”: ware zien wäörd!
Óngeluivelik!
Veer daag later meus Jaer opgnaome waere in ’t gashoès te Venlo mit ‘n opeinhuiping van vóch in zien lóngwaefsels. Verdreid Jaer bleek, nao inkele ónderzeuke, toch óngenaeslik krank te zien. Al gauw verhoèsde hae nao ‘t hospice Doevenbos te Hôrs. Heej is Jaer al die daag mit vuuël genaegeheid, leefdevol verzörg gewaore door de verpleegkundigen en vreejwilligers.
Inkele SVB’ers en naoste vrinde hebbe dao Jaer bezóch en “in stille gedachte” van um aafschièd genaome. Waat zulle weej in noeëd dich nog döks misse, beej SVB aevel ouk beej ós in de buurt. ’t Is stil in de straot!

22-nov-2016 30-nov-2016

Altièd stónd Jaer veur idderein klaor en bood drek de helpende hand beej allerhand dringende kerweikes. Noeëts waas det tevergaefs!! Oèt alle “windstreke” kwame minige luuj nao Jaer toe um gooje raod, as d’r weer ens iets kapot waar gegaon. Mit al zien kinnis en kunde kós hae haos idder mankament in zien good oètgerösde werkplaats, mit eige gereidschap, oplosse.
Jaer haet hièl waat minse bliej en gelökkig gemak. As naoste naober heb ik det haos viertig jaor aan de lieve kinne óndervinde en heb det döks mit eige ouge, heej taegeneuver, zeen gebeure. Veurluipig zulle weej zien werk in ós dageliks laeve nog geregeld taegekómme as stille getuùge van zien vakmanschap. Dreejentachetig jaor lang, is Jaer zien SVB trouw gebleve, jao det door diek en dun.
Dit bewónderingswaerdige, uùters zeldzame feit zal mit golde letters waere opgeteikend en toegevoog aan de toch al zoeë rièke historie van ós aller SVB. Aan dae laevesloup van ós vereiniging haet Jaer naodrökkelik meigebouwd, in de beginjaore as begenadige voetballer, vervolges as bekwaam bestuurder en allewiels al weer decenia lang beej ut technisch ónderhald tot zelfs veur inkele jaore truuk.
As jeugspeulerke van ut Patronaat Van Lambertus kwaam Jaerke nao SVB.  Klóm in 1940 van ut 9e elftal, me telde toen nog door beej de jeug, nao ut ièrste van SVB. Hae speulde meistal back of half en stónd bekind um zien knappe, gedörfde technische hoeëgstendjes zoeëas: Beej veurzette van de taegepartie, d’n bal van inkele maeters aafstand, röstig in de hand van d’n eige kieper te köppe of eine hoeëge bal, in ein zièr lastige positie, doeëd op de wreef te make. Jaer haet van 1940 wies 1956, ruùm 15 jaor in ut 1e elftal van SVB gespeuld, waovan 5 jaor as aanvoerder.
Ut blessure-duùvelke bleef aevel achter um aanzitte en in 1945 volgde ein operatie. Voetballe waas veur Jaer smeis ein doorlopend cómpromis aevel zien groeët door zettings-vermeuge heel um op de bein. In 1956 noeëdgedwónge, stopde Jaer mit prestatief-voetbal en ging heejnao beej de Veterane van SVB speule. Jaer waas sterk gehech aan zien geleefde voetbalsport en sloog gen inkele training euver.
Hae ging, beej wièze van spraeke, mit voetbal nao bed en stónd d’r ouk weer mei op. D’n huwelikse staot mit zien Greet haet dao, nao ik weit, noeëts ónder hove te lieje want eur diamante broèlof  toendertièd hebbe zeej nog groeëts same gevierd.  Aevel in april 2014 sloog plotseling ’t noeëdlot toe, Greet brook door eine val op de plaats, eur häöp en meus in ’t gashoès geopereerd waere. Nao inkele waeke verslechterde eur situatie en Greet kwaam te euverlieje. Jaer kwaam opens allein te staon, zien groeëte leefde en laevesgezellin waas d’r neet mièr. Dae sterke man perbeerde zich “staonde” te halde, aevel de óngemake van ’t alder waere werkde um idderskièr taege.
Jaer woel heejveur neet wièke, d’n “ièzerman” goof neet op, aevel zien bein, ouge en gehuùr lete um beej deze strièd örtelik in de steek. Dae stoere mins van waalièr meus iddere daag inlevere en schravelde op lets door zien hoès. Jaer vereinzaamde, waas afhankelik van bezeuk, smeis dröppelde euver zien wang ein traon.
Allein zien kint genne thoès!  Kers-ingelkes hebbe Jaer gehaold en truuk gebrach nao zien geleefde Greet, zien eige vruike det hae al die jaore zoeë haet mótte misse. Jaer & Greet zien noow weer same! Aan ein waal bestaejd lank laeve is ein ind gekómme, ós dreuvenis wuurd euverstump door geveules van tevraejenheid.
Op vriedaag 23 december is ónder groeëte belangstelling, wao ónder talrièke SVB’ers in de aula van ’t crematorium te Blièrick op ein zièr waerdige meneer van Piërre Heemskerk aafschièd genaome. De oètvaartspraekster noom ós mei door ‘t laevesverhaol van Piërre & Greet, begeleid door ein mit zörg oètgekaoze, prachtige foto-rippertage, gemak door Ellen en Lotte. Kleindochter Lotte vertelde, op ein zièr aandoonlikke wièze, wie het opa’s hand vashaldend,  zoog wie hae in alle rös insleep en de letste aosem oètbloos. Aangrièpend ware de wäörd van schoeëndochter Majanne det Pap zoeë beröstend had meigemak in de letste daag van zien aerdse bestaon.
Tot slot bedankde zoon Jan idderein veur de werme belangstelling, hölp en gooje zörg  veur Pap in de letste jaore zien einzaam bestaon, veural nao ’t haergaon van Mam.
Jaer bedank veur diene groeëte inzet, hölpvaerdigheid, de ónverwaerdelik vrindschap en trouw lidmaotschap aan SVB en Ald SVB. Hojje schoeëne deerbare kammeraod, adieu behölpsame naober! Weej zulle dich noeëts, nae noeëts vergaete! Ós vrindschap is ónsterfelik en zal veur ieuwig bliève bestaon! Weej laeve mei mit ut verdreet van zien kinder, kleinkinder en achterkleinkind, as ouk van de vaerdere femilie, vrinde en bekinde.
Hièl vuuël sterkte toegewins en weej haope van herte det ut groeëte gemis van Pap en Opa, gauw zal waere euverstump door de dankbare herinnering aan ziene veurbeeldige laevesstièl.
Meuge dees wäörd van troeës óg heejbeej behölpsaam zien.
Herman Hermsen, ière-veurzitter S.V.B .oostrum-21-dec-2016-034

 

You may also like...