Ièrbetoeën aan: Graad Haoves

In de morge van vriedaag 1 juni 2018 is ós zièr gewaardeerd ièrelid Graad Haoves, nao ein kortstóndige krankheid, toch nog ónverwachs van ós haergegaon.
Zien sterve haet ós allemaol weer doon beseffe det d’n doeëd op nemus geit wachte, aevel döks inens toesleit!Van ein verkaldheid knapde Graad van de winter maar neet op.
Hae begós te plare en had aaf en toe haos genne aom. Nao ónderzeuke in ’t Gashoès, kreeg hae van de lóngarts d’n oètslaag. Graad waar óngenaeslik krank en kós neet mièr baeter waere! Gelaote leet hae dees beïngstigende baodschap euver zich haer kómme, kinnelik beröstend in waat zien lot waar.
Maar ónderwiel sloot Graad zich aaf, hae woel gaar nörges mièr euver praote! Ziene doeëdstrièd waar begós, zwaore                  meiddesiene zörgde, det hae gen pien hoofde te lieje. Nao inkele daag is Graad oètintelik röstig en kalm ingeslaope! “As ik d’r strakkes neet mièr bin, hald dan alles bescheie”.
“Ik heb in mien laeve al genóg aandach gehad”, waas Graad ziene letste wins! SVB is zièr bedreuf umdet ein van zien aldste leeje in “deensjaore” ós haet verlaote! Ónbegrièpelik eigelik want begin november mochte weej um nog höldige veur zien 70-jäörig trouw lidmaotschap van ós vereiniging.
De SVB-vlag, aan de ingank van ós Sportpark, is vurrige waek as ièrbetoeën aan Graad halfstok gehange.  D’n oorlog waas amper veurbeej en Graadje Haoves melde zich al as 10 jäörig bóksemenke aan beej de St. Annawaeg, um dao mit zien kammeräödjes in clubverband te gaon voetballe. In de oorlogjaore hadde de speulvelder beej SVB vuuël te lieje gehad en meuste nuuëdig gerinoveerd waere.
Aan d’n Boekenderwaeg waas ’n noeëdveld ingerich, aevel det had ’n huuëgteverschil van 20-30 centimaeter. Vandaor de oètdrökking weej meuste de ièrtse helf bergop speule! Ein van zien ièrste leiders dae Graadje toendertièd opving, waas de legendarische Frits Pieëters, “de Spieker”. Graadje waas ’n behendig speulerke, gewieks en begaeve mit vuuël technische truukskes. Hae óntwikkelde zich tot eine bevlaoge snelle rechsboète en speulde zich, ind vièftiger jaore, door de juuste inzet, in ’t ièrste elftal van SVB.
In 1957/58 waas SVB gedegradeerd nao de 3e klasse en woord ’t jaor dao nao al kampioen. Gelökkig weer truuk in de vertouwde 2e klasse, mit zelfs promotie nao de 1e klasse in 1963. In det elftal speulde toen Piet Smeets, Coen Verberkt, Alphóns en Tony Verhaegh, Harald Stoter, Hay Wetjens, Gerry Stamfort, Boy van de Laar en Graad zelf. ’t Elftal van trainer Smits, is groeëts ingehaold in Blièrick en wies d’n haan weer kreide woord d’r stevig fees gevierd.
As dertiger ging Graad aafbouwe beej ‘t pas opgerichte ièrste veterane elftal, ónder de bezeelende leiding van de legendarische Toeën van der Velde. Gerry en Frits Stamfort, Piet Smeets, Tonny Kepser, Jac. Cordang en Boy van de Laar speulde dao ouk in. Wie Graad 45 jaor woord hóng hae veur good zien voetbalschoon aan de wilgebuim. Graad waas ouk jaore eine verdeenstelikke jeugleider en in de tachetiger jaore senioreleider, ièrs van ‘t 2e elftal en later van ós 3e elftal.
Beej Ald-SVB waas Graad ruum 15 jaor bestuurslid in de functie van penningmeister. Heej, tösse zien voetbalvrinde van waalièr, veulde Graad zich thoès, waobeej de visdaag en de rikaovende in de wintermaonde ziene veurkeur hadde.
Op woensdaag 6 juni is ónder groeëte belangstelling, wao ónder talrièke SVB’ers, veterane, bestuurleeje en ièreleeje, in de aula van ’t crematorium te Blièrick op ein zièr waerdige meneer van Graad Haoves aafschièd genaome. De oètvaartleidster noom ós mei door de laevesloup van Graad, idderskièr örges de toeën opleggend!
Mezièk van Heintje, Graad’s geleefde zenger van waalièr, klónk:
“Deine trainen sind auch meine”.
Spesjaal veur de kleinkinder luùsterde weej same nao Marco Borsato mit ’t leedje:
Opa
Vroeger zat ik uren op de stoel bij opa, hij vertelde me dan altijd een verhaal…..
…..Opa sloot voorgoed zijn ogen en hij slaat ze nooit meer op!
Doe wat je altijd deed
Huilen als je huilen moet, want ik voel jou,
Ik beleef alles met jou,ik ben dicht bij je,
waak over jou en als je me zoekt ben ik er altijd!
Tafrièle van troeës beej de naoste femilie die ’t zichbaar allemaol erg kwaod hadde mit ’t aafschièd van zó’nne ónvergaetelikke man, vader en opa.
Waat ein moeëj aafschièd, minnig träonke rolde euver de wange.
Beej ’t verlaote van de aula klonk van Andrea Bocelli:
Con te partirò-Time to say goodbye-Tièd um aafschièd te neme.
Graad bedank veur dien werme vrindschap, sportieve inzet en gooje samewerking.
Beej S.V.B. zulle weej dich noeëts vergaete, maar herinnere as eine trouwe sportvrind.
Adieu kammeraod, hoije kaerel!!!
Echte vrindschap vergeit neet, aevel zal altièd bliève bestaon!
Weej laeve mei mit ‘t verdreet van zien vruike Lenie, zien zeuns Marcel en Maurice, zien schoeëndöchter Ingrid en Fleur, opa’s oug-eppelkes de kleinkinder Sven, Celine, Noa, Melle, Casper en Robin, as ouk van de naoste femilie, vrinde en bekinde.
Allemaol hièl vuuël sterkte toegewins en weej haope van herte det ‘t groeëte gemis van Graad, nao verloup van tièd zal waere euverstump door hièl vuuël dankbare herinneringe oèt ziene prachtig sportieve en werksame laevesloup.
Meuge dees wäörd van troeës óg heejbeej behölpsaam zien.

Names bestuur en leeje van SV Blerick  

Herman Hermsen, ière-veurzitter S.V.B .

 

You may also like...